كبة بالصينية

كبة بالصنية 

المكونات:

بالنسبة للكبة أنا بجيبها جاهزة من اللحام بيعملي الخلطة وبستملها وبشتغل فيها (لحمة وبرغل وبصل وملح وبهار حلو وجوزة الطيب)

بس اذا حابين تعملوها بالبيت ومتوفر فرامة مكوناتها كالتالي:

كيلو لحمة عجل مفروم ناعم

2 كوب برغل ناعم مغسول

عدد 1 بصلة مفرومة

رشة ملح حسب الكمية والرغبة

رشة بهار حلو حسب الرغبة

ورشة جوزة الطيب

نص زبدة 50 جرام من حرارة الغرفة نعجنها معهن

منعجنهن سوى وبالخلاط شوي تينعم الملمس ويتماسكو 

الحشوة:

بصل مفروم

لحمة مفرومة ناعمة

بهار حلو

ملح حسب الرغبة

رشة سماق آخر شي

صنوبر محمر آخر شي حسب الرغبة

منقلي البصل بشوية زيت وبنزل عليها اللحمة المفرومة وبرش الملح والبهار وبقليها لغاية ما تستوي منيح على الآخر برش عليها السماق رشة واذا حابين ممكن تضيفو صنوبر محمر وتخلطوهن منيح ومنطفي النار 

طريقة فرد الكبة:

ندهن الصنية بالزبدة ونحط بجانبنا كاسه فيها ماء مشان نبل اليدين وبعدين نفرد بيصير أسهل، ونفرج الطبقة الأولى ونسويها بإيدنها متل الفيديو وبعدين نحط خلطة الحشوة للحمة المفرومة وبعدين نحط طبقة تانية من الكبة ونفردها وآخر شي منشكل الوش بالشوكة أو السكينة بالشكل اللي بتحبو على الوش بحط شرايح صغيرة زبدة موزعه مشان يتحمر ومندخلها الفرن على حرارة 180 لمدة 40 – 45 دقيقة متل خبز الكيك... وصحتين