.
محاشي
ورق عنب وكوسا وملفوف
المكونات للحشوة:
٥ بصلات كبار مفرومين ناعم
٢ كوب خضار مفروم (بقدونس وكزبره خضرا وشبت- عادة بفرمهم وبخلي منهم في الفريزر خلطة مكونة من ١٠ بقدونس ٢ كزبره و ٥ شبت)
٥ حبات بندورة (طماطم) مفرومين صغير
٣ مكعبات ماجي
بهارات (م ص بهار حلوة - نص ملعقة صغيرة من كل من الزنجبيل والبصل البودرة والكركم والبابريكا وربع ملعقة صغيرة من كل من الكمون والشطة الحمرا)
علبة صلصة صغيرة كي دي دي
نص فنجان قهوة صلصة التمر هندي
نص فنجان قهوة دبس الرمان
٤ أكواب رز مصري مغسول ومتصفي
ونحتاج مرطبان ورق عنب
ملفوفة كبيرة مسلوقة ومفتحين ورقها
٢ كيلو كوسا منقور
مكونات مرقة المحشي:
علبة صلصة كي دي دي
لتر ماء (٤ أكواب)
نص ملعقة صغيرة بهار حلو
ملعقة صغيرة ملح
فنجان قهوة دبس رمان
فنجان شاي زيت زيتون
نعنع ناشف ناعم (لوش محشي الملفوف)
الطريقة:
طريقة الحشوة طبعا اهم شي وبعدين منستخدمها لنحشي اَي نوع خضار
بطنجرة نضع شوية زيت وبنزل البصل يتقلى تيدبل وبعدين بنزل الخضار المفروم وبس يدبل بنزل البندورة تتقلى معهن وبزيد الماجي والبهارات
بس يتسوى الخضار بنزل الصلصة ثم التمر هندي ودبس الرمان وبترك الخلطة تنطبخ سوى ١٠ دقايق وبعدين بنزل فوقهن الرز ويخفف النار وبخلطهم سوى جيدا وبغطي الطنجرة وبتركهن ربع ساعة مشان الرز ياخد ربع الى نص استوى من ماء الخضار وبعدين بطفي النار وبترك الحشوة تبرد
بس تبرد الحشوة ببتدي احشي الكوسا والورق عنب والملفوف وبقعر الطنجرة بحط شرايح بندورة وبصل (ممكن بطاطا) وبرص الورق عنب والكوسا سوى وبطنجرة تانية نضع في القعد شرايح الملفوف القاسية اللي شلناها وبرص فوقها الملفوف
بخلط مكونات المرقة سوى وبحط فوق الطنجرتين
بحط الطنجرة على نار قوية وبغطيها لغاية ما تغلي بنقلها على العين الصغيرة على نار خفيفة تتسوى على نار هادية لساعتين او ثلاث ساعات وبطفي النار تحتهن
الملفوف قبل ما أطفئ النار بنص ساعة برش على الوش نعنع ناشف وبغطيها وبعدين بطفيها
وهيك المحاسب صارت جاهزة لأحلى متابعين...تفضلوا معنا وألف صحة وهنا
فيديو مصور لخطوات الوصفة موجود على الـ IGTV 👀🎥
No comments:
Post a Comment