لازانيا

لازانيا 

المكونات:

علبة معكرونة لازانيا (في نوعين الأبيض العادي والأخضر بالسبانخ – أنا اليوم مستعملة السبانخ)

خلطة بشاميل جاهزة أو شغل بيت – سبق وحطيت طريقة تحضيرها بالبيت، أنا اليوم استعملت الجاهزة (استعملت ما يكفي 2 لتر)

نص كيلو لحمة مفرومة

4 بصل مفروم

5 فليفلة حلوة

3 جزر مبشور

5 بندورة مقطعة مكعبات أو مضروبة بالخلاط خفيف

2 م كبيرة صلصة

كوب ونصف ماء

ملح / بهار حلو/ جوزة الطيب / بودرة زنجبيل / بوردة بصل/ رشة هيل مطحون

موزاريلا للوش (اختياري) 

الطريقة:

أهم شي أنه أنا اللازانيا ما بسلقها أبداً مثل ما هيه بتستوي مع المكونات 

البشاميل بجهزة بطنجرة حسب نوع البشاميل الجاهز اللي عمتستعمليه مكتوب عليه كمية أكواب الحليب، أو بتستعملي حليب جاهز أو حليب بودرة، أنا استعملت حليب بودرة ولكل كوب ماء معلقة كبيرة حليب بودرة، بخلطهن منيح وبحطهن على النار وبستمر بالتحريك لغاية ما تتماسك

بنفس الوقت بكون مجهزة الخضار مقطع، وبالطنجرة بقلي البصل المفروم وبنزل اللحمة المفرومة وبحط كل بهاراتي والملح حسب الرغبة، بس تستوي اللحمة بحط الخضار دفعات وبحرك وبحط معلقتين صلصة كبار والماء وبحرك وبتركه على النار حتى يغلي 10 دقايق وبطفي 

هيك بيكون البشاميل جاهز وخلطة الخضار جاهزة المهم يكونو سخنين كويس لأنه هيدا رح يكون له دور يسوي اللازانيا بالفرن بدون ما تكون مسلوقة. 

مثل الصور بالصنية اللي رح نخبز فيها، نضع طبقة من اللازانيا ثم طبقة من الخضار باللحمة فوقها ثم طبقة بشاميل، وبعدين بعيد الطبقات بنفس الطريقة تتخلص الكمية، أهم شي إنه آخر طبقة رح تكون لازانيا وفوقها بشاميل فقط.

ندخل الصنية الفرن على نار 180 لمدة ¾ ساعة إلى ساعة تقريباً حسب حرارة فرنك المهم يكون الوش حمر... ممكن آخر مرحلة اذا بتحبو ترشو للوش جبنة موزاريلا وبس تسيح تطلعوها من الفرن... ومنسكبها ومناكلها وصحتين... يمييييي