معمول السميد
بمناسبة عيد الفطر السعيد ينعاد عليكن وهاي طريقة معمول السميد
المكونات:
٢ كوب سميد خشن
٢ كوب سميد ناعم (فرخه)
٢ م ك سكّر ناعم الحبيبات وليس بودرة
٢٠٠ غرام زبدة
١ م ص محلب
١م ص بهارات كعك
١ م ك حليب بودرة
فنجان قهوة صغير نصه ماء زهر ونصه ماء ورد
١ م ص خميرة فوريّة
ربع كوب ماء زهر
ربع كوب ماء ورد
الحشوات اللي ممكن نستعملها:
١- تمر معجون بالزبدة مع شوية هيل أو يانسون أو بس زبدة
٢- حلقوم (راحه - كبدة الفرس - حلقون)
٣- فستق أو جوز مطحون مخلوط مع سكر وشوية ماء زهر وماء ورد
الطريقة:
في وعاء كبير نحط السميد الخشن والناعم والسكر والمحلب وبهارات الكعك والخميرة والحليب البودرة يعني كل المواد الناشفة ونخلطها سوى جيدا... نسيح الزبدة ونضيف فنجان القهوة اللي فيه ماء زهر وماء ورد ونفرك الخليط فيهم جيدا حتى يتوزعو ويمتزجوا قدر المستطاع... بعدين نضيف الزبدة السايحة تكون دافية (ولا بارده ولا سخنة) وكمان نفرك الخليط بالزبدة بكف ايدينا فرك جيد حتى يمتزجوا... اخيراً نضيف ربع كوب ماء زهر وربع كوب ماء الورد ونعجن كل الخليط جيدا ونغطي العجين ونتركها ترتاح على الأقل نص ساعة... نبتدي نحشيهم بالحشوة اللي منحبها ونشكلها بالقوالب ونضعها بصينية الفرن وندخلها فرن حامي مسبقا على حرارة ١٨٠ لمدة ٢٠ الى ٢٥ دقيقة اول ما يصير لونها ذهبي وتكون اخدت لون احمر خفيف من تحت نطلعها ونتركها تبرد وحسب الرغبة ممكن ترش الوش سكر بودرة شي بسيط وصحتين 😋🌸
وكل عام وأنتم بخير
No comments:
Post a Comment